فـــــــــــــــــــــاس العنا

بسم الله الرحمن الرحيم

يقول من ليله غدا بـه تهوجـاس
ابيات شعرن من هجوسٍ حزينـا
لاباس ياقلبٍ بـه الهـم لابـاس
اصبر على جور الزمن والسنينـا
الوقت ياكم واحدٍ ضاربـه فـاس
فاس العنـا لابـد يظهـر يبينـا
وقتٍ سبق جار بكليبٍ وجسـاس
والزير ذلّه عقـب رفـع الجبينـا
اشوف ناسٍ غرّها الوقت بلبـاس
بالمظهر اللايـق وخافيـه شينـا
الوقت ياكم واحدٍ منـه محتـاس
في عزلته محبوس مثـل السجينـا
يقوله اللي آخـذٍ منـه مـرواس
مرواس حزنٍ باح منـه الكنينـا
واقلبي اللي مثل بنٍ فـي محمـاس
حزنٍ ودمعٍ صـاروا الحامسينـا
الله من كثـر التفاكيـر فالـراس
قمنـا نلاعبهـا يسـار ويمينـا
ماعاد نعرف نومنا غيـر بانعـاس
عيّا لذيذ النـوم يضـوي علينـا
نصبر ولانشكي على جملة النـاس
ألغير رب البيـت ماقـد شكينـا
عزيز نفس ومرهف القلب حسّاس
ونفسي حلفت اني ابد مـا أهينـا
ولاني من اللي كلمته حبر قرطاس
إليا بغيت الهرج قلـت السمينـا
مافي كثير الهرج زودن ونومـاس
لاصار مابـه فـود دنيـا ودينـا
ميّزت بالعالم لقيت ابهـم اجنـاس
ابهم غشيمٍ وابهـم ايضـاً فطينـا
بعض البشر للطيب باحث وعسّاس
والباقي منهـم فالزلـل ضايعينـا
سبحان منهو جاعل اجناس بالناس
الحمد له مـن حطّنـا مسلمينـا
وابسئله يزيـل همّـي والاتعـاس
ربٍ كريـمٍ يفـرح اليـا دعينـا
واعوذ به من شر وسواس خنّـاس
ربٍ رحيـمٍ فـرد عالـي معينـا
ربٍ بخيره يحيي اعـروق يبّـاس
تخضّر عقب الوقت تزهـو تزينـا